معتقل سابق في الفرع ٢٥١
إسمي صهيب عبدالله الجعمور، اعتقلت بتاريخ ٢٢-٠٤-٢٠١١ بفرع أمن الدولة الداخلي "الخطيب" ٢٥١. مدة التحقيق كانت معي ٦ أيام.
حقق معي أنور رسلان اللي طبعًا عرفت إنو هذا هو أنور بعد ما طلعت صوره وطلعت محاكمته بألمانيا. طبعًا أنور رسلان لما حقق معي استخدم معي عصاية الكهربا اللي لهلق طبعًا ما بنسى ولا بتروح آثارها عن جسمي بنوب بنوب. هلق بالنسبة لمحاكمته ما ممكن يعني بصراحة إني كون سعيد أو مثلًا إني كون مثلًا فرحان بسبب محاكمته، إنو تكون محاكمته بألمانيا، لأنو طبعاً لازم تكون المحاكمة بالداخل السوري، ويكون طبعًا القاضي أحد أهل الضحايا اللي تعذبوا تحت إيدو، أو مثلًا اللي اغتصب أحد أهله تحت إيدو، أو مثلًا كانو هو السبب بوفاة حدا من أهله، لأنو طبعًا وقتها رح يكون القرار طبعًا عادل أو رح يكون القرار الصحيح.
هلق المحكمة ممكن بصراحة تحقق يعني جزء من العدالة بس ما ممكن تحقق عدالة كاملة بما يرضي جميع الضحايا طبعًا. ممكن يعني تكون عادلة بشرط واحد إنو يكون مثلًا القاضي أحد الضحايا أو أحد أهل الضحايا. بسبب إني كنت مثلًا من الناجين أو مثلًا ما تعرضت لأي أذى كبير، فممكن أكون مثلًا راضي بهاي النتيجة هلق انو عم يتحاكم هيك محاكمة، بس ما هي المحكمة اللي بترضي بصراحة كل الناس، أو مثلًا بترضي كل الأشخاص اللي تعذبوا تحت إيدو.
هلق بتمنى بصراحة إنو ياخد متل ما بقولوا القرار العادل، أو المحكمة العادلة، وبصراحة بتمنى إنو يكون يعني في عقوبات مشددة عليه إنو ما ممكن مثلًا تتخفف عنه بيوم من الأيام، لأن بصراحة متل هيك ناس، حرام هني يكونوا ناس بنفس الوقت بس.. هذا حال الدنيا...